SOCAR-ın Mürəkkəb Qazma İşləri Trestinin (MQİT) və Bahar Energy Operating Company (BEOC) şirkəti arasında əməkdaşlıq memorandumu imzalanıb. Bu barədə MQİT məlumat yayıb, Report xəbər verir.
Saziş MQİT-in geniş qazma təcrübəsindən Azərbaycanın Xəzər sektorundakı Bahar və Güm Dəniz yataqlarında potensial işlər üçün istifadə etməyi nəzərdə tutur.
Memorandum çərçivəsində birgə layihələrin hər iki şirkətin strateji məqsədlərinin irəliləməsinə töhfə verəcəyi gözlənilir.
Yataqlar 2009-cu ildə SOCAR və Bahar Energy Limited arasında bağlanmış hasilatın pay bölgüsü sazişi ilə idarə olunur. Sazişə əsasən, Bahar Energy-yə 80%, SOCAR-a isə 20% pay düşür. 25 il müddətinə (əlavə 5 il uzadıla bilər) bağlanmış müqaviləyə görə, Bahar Energy tərəfindən tam maliyyələşdirilən ilkin 1 milyard dollarlıq investisiya proqramı nəzərdə tutulub. Yataqlarda qalan qaz ehtiyatlarının həcmi təxminən 25 milyard kubmetr qiymətləndirilir.
1955-ci ildə istismara verilmiş Güm Dəniz yatağı Bakıdan 21 km cənub-şərqdə yerləşir, Bahar qaz yatağının işlənməsi isə 1969-cu ildə başlayıb.
https://report.az/en/energy/socar-beoc-ink-memorandum-of-co-op-on-bahar-gum-deniz-fields