Azərbaycan Dövlət Neft Şirkəti (SOCAR) "Ağıllı şəhərsalma və sənaye həlləri" mövzusunda innovasiya müsabiqəsinə start verib. Bu barədə "Report"a SOCAR-dan məlumat verilib.
Bildirilir ki, müsabiqənin məqsədi smart urbanizasiya, "ağıllı şəhər" sistemləri, dayanıqlı urban inkişaf və texnologiya əsaslı innovativ ideyaların formalaşdırılmasına və inkişafına şərait yaratmaqdır.
SOCAR bu təşəbbüslə enerji və sənaye infrastrukturu sahəsindəki rolunu, həmçinin ekoloji məsuliyyət, dayanıqlı inkişaf və texnologiya əsaslı idarəetmə yanaşmalarının artan əhəmiyyətini nəzərə alaraq, şəhər mühitindəki mövcud çağırışlara uyğun innovativ həllərin hazırlanmasını təşviq edir.
Enerji, ekologiya, su, infrastruktur və şəhər sistemləri ilə bağlı mövzuları əhatə edən müsabiqə iştirakçılara real urban və sənaye-şəhər çağırışlarına sistemli yanaşmaq, texnologiya əsaslı həll konsepsiyaları hazırlamaq və bu ideyaları mentor dəstəyi ilə inkişaf etdirmək imkanı verəcək.
Seçilmiş komandalar 6 həftəlik strukturlaşdırılmış proqramda iştirak edəcəklər. Proqram müddətində iştirakçılar mentorlarla işləyəcək, problemin mahiyyətini təhlil edəcək, həll konsepsiyasını formalaşdıracaq, texniki, əməliyyat və təşkilati tətbiq imkanlarını qiymətləndirəcək və final təqdimat üçün layihə istiqamətini hazırlayacaqlar.
Müsabiqə aşağıdakı tematik istiqamətləri əhatə edir:
şəhər və sənaye zonalarında hava və səs keyfiyyətinin monitorinqi;
urban mühitdə paylanmış bərpa olunan enerji həlləri;
çirklənmiş və istifadəsiz qalmış sənaye ərazilərinin "smart" monitorinqi və bərpası;
sənaye və tullantı sularının ağıllı idarə olunması;
"smart" enerji infrastrukturu, rəqəmsal ölçmə və "data" əsaslı idarəetmə sistemləri.
Proqramın sonunda komandalar öz layihə konsepsiyalarını "Demo Day" çərçivəsində təqdim edəcəklər. Təqdimatlar problemin aktuallığı, həllin keyfiyyəti, tətbiq oluna bilmə potensialı, innovasiya və dəyər yaratma imkanı, həmçinin layihənin proqram müddətində inkişaf səviyyəsi əsasında qiymətləndiriləcək.
Kimlər müraciət edə bilər?
Müsabiqədə tələbələr, gənc mütəxəssislər, tədqiqatçılar, startap və innovasiya komandaları, eləcə də şəhərsalma, mühəndislik, ekologiya, enerji, rəqəmsal texnologiyalar, data analitikası, dayanıqlı inkişaf və urban sistemlər sahələrinə marağı olan multidissiplinar komandalar iştirak edə bilər.
İştirakçılara aşağıdakı imkanlar təqdim ediləcək:
real urban və "smart city" çağırışları üzərində işləmək;
mentorlarla strukturlaşdırılmış iş sessiyalarında iştirak etmək;
ideyanı layihə konsepsiyasına çevirmək;
problemin aktuallığını, həllin tətbiq imkanlarını və potensial təsirini əsaslandırmaq;
final təqdimat bacarıqlarını inkişaf etdirmək;
layihəni "Demo Day" zamanı təqdim etmək;
seçilmiş ideyalar üzrə mümkün növbəti inkişaf imkanlarının nəzərdən keçirilməsi.
Müraciət qaydası:
Müsabiqədə iştirak etmək istəyən komandalar aşağıdakı link vasitəsilə müraciət formasını doldurmalıdırlar: https://docs.google.com/forms/d/e/1FAIpQLSfyZkFCqyjwL-LxZor3e2wrt5ZA2FWzLAFWqrhERhQvS0Vpwg/viewform?usp=header
Son müraciət tarixi: 26.06.2026
Əlavə məlumat üçün: innovations@socar.az / əlaqə nömrəsi: +994 50 841 54 74
https://report.az/energetika/socar-agilli-sehersalma-ve-senaye-helleri-movzusunda-innovasiya-musabiqesini-elan-edir