Azərbaycan və Çin neft-qaz sektoru və yaşıl enerji sahəsində potensial layihələri, o cümlədən Xəzər dənizində mümkün enerji layihələrini müzakirə ediblər, "Report" Azərbaycanın Energetika Nazirliyinə istinadən xəbər verir.
Müzakirələr energetika naziri Pərviz Şahbazov ilə Çin Milli Dəniz Nefti Korporasiyasının (CNOOC) sədri Çjan Çuanzyan arasında keçirilən görüşdə aparılıb.
Tərəflər Azərbaycan ilə Çin arasında strateji tərəfdaşlığın inkişafından məmnunluq ifadə edərək, iki ölkə arasında müxtəlif sahələrdə uğurlu əməkdaşlığın enerji sektorunda da geniş imkanlar yaratdığını qeyd ediblər. Onlar həmçinin iki ölkə arasında strateji əməkdaşlığın daha da gücləndirilməsinə yönəlmiş sənədlərin əhəmiyyətini vurğulayıblar.
Görüşdə Azərbaycan və Çin şirkətləri arasında mövcud enerji əməkdaşlığı, habelə mövcud tərəfdaşlığın inkişaf etdirilməsi və yeni birgə layihələrin həyata keçirilməsi imkanları müzakirə olunub.
CNOOC nümayəndələri Azərbaycanda həyata keçirilən enerji layihələrində iştirak etmək marağı ifadə ediblər.